ఐపీఎల్ ప్లేఆఫ్స్ రేసు: 8 జట్ల మధ్య హోరాహోరీ.. ఎవరి అవకాశాలు ఎలా వున్నాయి?

ఐపీఎల్ 2026 సీజన్ ప్లేఆఫ్స్ రేసు ఊహించని మలుపులతో అత్యంత రసవత్తరంగా మారింది. ఓటమి అంచున నిలిచి, వరుసగా మూడో పరాజయం చవిచూస్తుందనుకున్న రాయల్ ఛాలెంజర్స్ బెంగళూరు (ఆర్సీబీ), ముంబై ఇండియన్స్ (ఎంఐ)పై చివరి ఓవర్లో సాధించిన థ్రిల్లింగ్ విజయంతో సమీకరణాలను ఒక్కసారిగా మార్చేసింది. ఈ గెలుపుతో ఆర్సీబీ 14 పాయింట్లతో పట్టికలో అగ్రస్థానానికి దూసుకెళ్లింది. అదే సమయంలో ఈ ఫలితంతో ముంబై ఇండియన్స్, లక్నో సూపర్ జెయింట్స్ జట్లు అధికారికంగా ప్లేఆఫ్స్ రేసు నుంచి నిష్క్రమించాయి. ప్రస్తుతం నాలుగు బెర్తుల కోసం మొత్తం 8 జట్లు పోటీలో నిలవడం ఉత్కంఠను రెట్టింపు చేస్తోంది.

వివిధ జట్ల ప్లేఆఫ్స్ అవకాశాలు:
రాయల్ ఛాలెంజర్స్ బెంగళూరు (ఆర్సీబీ): రజత్ పాటిదార్ నేతృత్వంలోని ఆర్సీబీ 11 మ్యాచ్‌లలో 14 పాయింట్లు, +1.103 నెట్ రన్ రేట్‌తో టాప్‌లో ఉంది. ప్లేఆఫ్స్ బెర్త్ ఖాయం చేసుకోవాలంటే వారికి మరో విజయం అవసరం. సాధారణంగా 16 పాయింట్లు ప్లేఆఫ్స్‌కు సరిపోతాయి. అయితే, మిగిలిన అన్ని మ్యాచ్‌లు గెలిచి టాప్-2లో నిలవాలని ఆర్సీబీ లక్ష్యంగా పెట్టుకుంది. దీనివల్ల ఫైనల్ చేరేందుకు రెండు అవకాశాలు లభించే క్వాలిఫయర్-1లో ఆడే ఛాన్స్ దక్కుతుంది.

సన్‌రైజర్స్ హైదరాబాద్ (ఎస్ఆర్‌హెచ్‌): ఎస్ఆర్‌హెచ్ కూడా 14 పాయింట్లతో ఆర్సీబీతో సమానంగా ఉన్నప్పటికీ, నెట్ రన్ రేట్ (+0.737) కారణంగా రెండో స్థానంలో ఉంది. ప్లేఆఫ్స్‌కు అర్హత సాధించాలంటే మిగిలిన మూడు మ్యాచ్‌లలో కనీసం రెండింటిలో గెలవాలి. మే 22న ఆర్సీబీతో జరిగే మ్యాచ్, క్వాలిఫయర్-1 స్థానాన్ని నిర్ణయించే అవకాశం ఉంది.

గుజరాత్ టైటాన్స్ (జీటీ): గుజరాత్ కూడా 14 పాయింట్లతో ఉన్నా, నెట్ రన్ రేట్ (+0.228) తక్కువగా ఉండటం ప్రతికూలాంశం. ప్లేఆఫ్స్ బెర్త్‌ను ప‌దిలం చేసుకోవాలంటే వారికి కూడా కనీసం రెండు విజయాలు అవసరం. మే 12న ఎస్ఆర్‌హెచ్‌తో జరగబోయే మ్యాచ్ వారికి కీలకం కానుంది.

పంజాబ్ కింగ్స్ (పీబీకేఎస్‌): మిగతా జట్లతో పోలిస్తే పంజాబ్ కింగ్స్ పరిస్థితి కాస్త మెరుగ్గా ఉంది. 10 మ్యాచ్‌లలోనే 13 పాయింట్లు సాధించింది. మిగిలిన నాలుగు మ్యాచ్‌లలో రెండు గెలిస్తే 17 పాయింట్లతో సునాయాసంగా ప్లేఆఫ్స్ చేరుకుంటుంది.

చెన్నై సూపర్ కింగ్స్ (సీఎస్‌కే): ఐదుసార్లు ఛాంపియన్ అయిన చెన్నై పరిస్థితి కొంచెం సంక్లిష్టంగా ఉంది. 16 పాయింట్ల మార్కును చేరాలంటే, మిగిలిన మూడు మ్యాచ్‌లలో కనీసం రెండింటిలో గెలవాలి. వారి నెట్ రన్ రేట్ (+0.185) తక్కువగా ఉండటంతో, 16 పాయింట్లు సాధించినా ఇతర జట్ల ఫలితాలపై ఆధారపడాల్సి రావచ్చు. అందుకే, మిగిలిన మూడు మ్యాచ్‌లూ గెలిస్తే నేరుగా ప్లేఆఫ్స్ చేరుకుంటుంది.

రాజస్థాన్ రాయల్స్ (ఆర్ఆర్‌): చెన్నైతో సమానంగా 12 పాయింట్లతో ఉన్న రాజస్థాన్ కూడా కనీసం రెండు విజయాలు లక్ష్యంగా పెట్టుకోవాలి. గత నాలుగు మ్యాచ్‌లలో మూడు ఓడిపోవడంతో వారి నెట్ రన్ రేట్ (+0.082) మరింత పడిపోయింది. నాలుగో స్థానం కోసం చెన్నైతో రాజస్థాన్ తీవ్రంగా పోటీపడే అవకాశం ఉంది.

కోల్‌కతా నైట్ రైడర్స్ (కేకేఆర్‌): కేకేఆర్‌కు అవకాశాలు ఉన్నా, దారి చాలా కఠినంగా ఉంది. ప్లేఆఫ్స్ చేరాలంటే మిగిలిన నాలుగు మ్యాచ్‌లలోనూ తప్పక గెలవాలి. అప్పుడు వారి ఖాతాలో 17 పాయింట్లు చేరతాయి. ఒక్క మ్యాచ్ ఓడినా, వారి అవకాశాలు ఇతర జట్ల ఫలితాలపై ఆధారపడి ఉంటాయి. 

ఢిల్లీ క్యాపిటల్స్ (డీసీ): టెక్నిక‌ల్‌గా ఢిల్లీ ప్లేఆఫ్స్ చేరడం దాదాపు అసాధ్యం. వారు మిగిలిన అన్ని మ్యాచ్‌లలో భారీ తేడాతో గెలవడంతో పాటు ఇతర జట్ల ఫలితాలు కూడా వారికి అనుకూలంగా వస్తేనే ఏదైనా అద్భుతం జరిగే అవకాశం ఉంది. వారి నెట్ రన్ రేట్ (-1.154) లీగ్‌లోనే అత్యంత దారుణంగా ఉంది.